ایرپورٹ پر حضرت مولانا دولت صاحب، مولانا صدام حسین صاحب اور یونس خان شیرانی ہمارے منتظر کھڑے تھے۔ مولانا دولت صاحب کی فراٹے بھرتی کار نے ایرپورٹ سے یونس بھائی کی قیام گاہ تک کا چمکتا، جھلملاتا اور نورانی قمقموں سے منور کوئی 31 کلومیٹر کا سفر نا قابل محسوس دورانیے میں طے کر لیا۔ دمام کا یہ دوسرا اور نیا ایرپورٹ ہے، جو 28 نومبر 1999 کو تجارتی ٹریفک کے لیے شروع کیا گیا۔

اس ایرپورٹ کی خوب صورتی اپنی جگہ، نمایاں خوبی یہ ہے کہ یہ رقبے کے لحاظ سے دنیا کا سب سے بڑا ہوائی اڈہ ہے، اتنا بڑا کہ دمام کے ٹھیک بغل میں واقع پوری مملکت بحرین کے پورے رقبے سے بھی بڑا ہے، جس کا ٹوٹل رقبہ 776 اسکوائر کلومیٹر ہوتا ہے، جس میں سے تعمیراتی حصہ 3 لاکھ اور 52 ہزار اسکوائر فٹ ہے۔ ہم مسافروں کا پہلا عربی کھانا یونس خان کے فلیٹ میں اور تا مدت قیام، قیام دمام سے متصل شہر الخبر میں واقع مسجد عبد اللہ بن عباس میں ہوا، جہاں ہمارے میزبان حضرت مولانا صدام حسین شیرانی نائب امام اور معلم ہوا کرتے ہیں۔ در اصل ہمارے حافظ صاحب کا فکری نظریہ یہ ہوتا ہے کہ سب سے بہترین قیام گاہ مسجدوں کے حجرے ہوا کرتے ہیں، جہاں جہاں سکون ہوا کرتا ہے، وہیں مولویانہ مزاج سے انتہائی قربت بھی۔

حضرت مولانا صدام حسین رضوی شیرانی دار العلوم فیضان اشفاق، ناگور سے فاضل اور سن 2015 سے یہاں بر سر روزگار ہیں۔ ابتداء آزادانہ کام کرتے تھے لیکن بعدہ بطور معلم یہاں قیام پذیر خارجیوں یعنی پردیسیوں کے بچوں کو ابتدائی تعلیم دینے لگے اور پچھلے کچھ وقت سے مسجد عبداللہ بن عباس میں نائب امام اور مؤذن کی حیثیت سے بھی خدمات انجام دے رہے ہیں۔

عربی نظام کے مطابق اصل مؤذن اور امام عربی ہی ہو سکتا ہے۔ ہاں! مسجد کی لوکل انتظامیہ اپنی طرف سے نائب امام کا تقرر کر سکتی ہے اور وہی انھیں وظیفہ بھی دیتی ہے۔ چوں کہ عام طور پر ہر کسی مسجد کے نمازیوں کی بڑی تعداد اردو دانوں اور خارجیوں کی ہوا کرتی ہے، اس لیے ہند و پاک نژاد یا اردو دانوں کے لیے یہاں اس کی گنجائش ہو سکتی ہے۔

ٹھیک اسی طرح کا شغل حضرت مولانا دولت صاحب کا عزیزیہ کی جامع راشد البلوی مسجد میں ہے۔ البتہ یہ مسجد عبداللہ بن عباس کے مقابل بہت کشادہ اور نہایت خوب صورت ہے کیوں کہ یہ مسجد ایک پرائیویٹ کمپنی کی مسجد ہے اور اس کا پورا نظم و نسق بھی وہی کمپنی دیکھا کرتی ہے۔

یہاں اس بات کی وضاحت بے جا نہیں ہوگی کہ ہمارے ہاں مسجدوں کے تزئین کاری میں جس قدر پیسہ صرف ہوتا ہے، یہاں کی مسجدوں کے طرز تعمیر سے لگتا ہے کہ تقریبا اتنے ہی یا اس سے ملتے جلتے بجٹ میں یہاں کی مسجدوں میں کچھ الگ ہی دیدہ وری اور کشش پیدا ہوتی ہے۔

بہت ممکن ہے اس کی بنیادی وجہ اسلامی مملکت کی وجہ سے عام عمارتوں کے مقابل اسلامی تعمیرات کو خاص رنگ دینے کا فن، فن کارانہ مزاج اور کثرت تعمیرات کی وجہ سے نئے خیالات کا ورود ہو جبکہ عام نگاہ میں اس کی وجہ ان کے بیرونی نقش ونگار سے زیادہ انفراسٹرکچر اور اندرونی رنگ و روغن، سہولیات اور مناسب ہائٹ وغیرہ ہیں۔

مولانا صدام صاحب از روئے منصب بھلے نائب ہوں لیکن در اصل امام اور مسجد کے سب سے بڑے ذمہ دار وہی ہیں کیوں کہ اصل امام صاحب صرف جمعہ اور رمضان المبارک کی نماز عشا کے علاوہ بقیہ دنوں میں گاہے گاہے مغرب میں آ جاتے ہیں۔

اس لیے وہ نہ صرف شکل و شباہت، انداز قراءت بلکہ لال رومال اور عربی عبا سے بھی تقریباً اتنے ہی عربی بن چکے ہیں، جتنے اپنی بے تکان مہمان نوازی اور ملنسار اخلاق سے اچھے انسان ہیں۔ ہم مہمانوں سے ہی نہیں اپنے ہر آشنا نا آشنا مقتدی سے بھی خنداں پیشانی سے ملنا۔

معاصرت کے باوجود ہمارے ساتھ بزرگانہ سا سلوک کرنا۔ آداب ضیافت کا بے پناہ خیال رکھنا اور سب سے نباہ کرتے ہوئے چلنا مولانا کی وہ خوبیاں ہیں، جو ان کو بہتوں سے ممتاز کرتی ہیں اور ان کے روشن نصیبے کی غماز ہیں۔ (جاری)

تحریر:- خالد ایوب مصباحی شیرانی

چیرمین: تحریک علمائے ہند، جے پور