مرشدی حضور تاج الشریعہ علیہ الرحمہ کا خوبصورت کلام ہے جب آپ پڑھیں گے تو دل عشق مصطفی ﷺ میں مچل جائے گا اور نگاہوں کے سامنے گنبد خضری کا حسیں منظر ہوگا کیونکہ آپ کے کلام میں قرآن کا ترجمہ وتفسیر ا ور حدیث کا مفہوم ہوا کرتا ہے۔ کلام حضور تاج الشریعہ رحمۃ اللہ علیہ ملاحظہ فرمائیں اور اپنے دوست واحباب تک شئیر کریں تاکہ آپ کے کلام سے مستفیض ہو سکیں
کلام حضور تاج الشریعہ
غموں کی دھوپ میں وہ سایہؔ زلف دوتا کردیں
جہاں بانی عطا کردیں بھری جنت ہبہ کردیں
نبی مختار کل ہیں جس کو جو چاہیں عطا کردیں
جہاں میں ان کی چلتی ہے وہ دم میں کیا سے کیا کردیں
زمیں کو آسماں کردیں ثریا کو ثری کردیں
فضا میں اڑنے والے یوں نہ اِترائیں ندا کردیں
وہ جب چاہیں جسے چاہیں فرما رّوا کردیں
ہر اک موجِ بلا کو بحر غم نا خدا کردیں
مری مشکل کو یوں آساں مرے مشکل کشا کردیں
عطا ہو بے خودی مجھ کو خودی میری ہوا کردیں
مجھے یوں اپنی الفت میں مرے مولی فنا کردیں
نبی سے جو ہو بیگانہ اسے دل سے جدا کردیں
پدر ، مادر ، برادر ، مال وجان ان پر فدا کردیں
شبِ تاریک پر دن کا گماں گزرے تبسم سے
ضِیاء رُخ سے دیواروں کو روشن آئینہ کردیں
کسی کو وہ ہنساتے ہیں کسی کو وہ رلاتے ہیں
وہ یونہی آزماتے ہیں وہ اب تو فیصلہ کردیں
گِلِ طیبہ میں مل جاؤں گلُوں میں مل کے کِھل جاؤں
حیاتِ جاودانی سے مجھے یوں آشنا کردیں
سگِ آوارہؔ صحرا سے اُکتا سی گئ دنیا
بچاؤ اب زمانے کا سگانِ مصطفی کردیں
زمانہ خو گر مے ہے نئ مے کی ضروت ہے
پلا کر اپنی نظروں سے وہ تجدیدِ نشہ کردیں
